سپریم کورٹ کا توہین عدالت کیس میں 34 ٹی وی چینلز کو شوکاز نوٹس کا تحریری حکم نامہ جاری

اسلام آباد (آن لائن) سپریم کورٹ نے توہین عدالت کیس میں 34 ٹی وی چینلز کو شوکاز نوٹس جاری کرتے بارے تحریری حکم نامہ جاری کردیاہے اور 2ہفتوں میں چینل مالکان کے دستخط کے ساتھ جواب طلب کرلیاہے۔چیف جسٹس سپریم کورٹ جسٹس قاضی فائز عیسیٰ، جسٹس عقیل عباسی اور جسٹس نعیم افغان نے فیصل واوڈا، مصطفیٰ کمال توہین عدالت کیس میں 34چینلز کو شوکاز نوٹس جاری ہونے کا حکم نامہ جاری کردیا۔حکم نامے میں کہا گیا ہے کہ شوکاز نوٹس پیمرا کے ذریعے بھیجا جائے اور چینلز 2ہفتوں میں شوکاز نوٹس کا جواب جمع کروائیں،

شوکاز نوٹس کا جواب آپریشنل ہیڈ اور چینل مالکان یا شیئر ہولڈر کے دستخط کے ساتھ ہوں۔عدالتی حکم نامے میں مزیدکہا گیا ہے کہ وکیل صفائی فیصل صدیقی کے مطابق ابتدائی جواب جمع کروا دیا، چینلز کے جواب پر دستخط کسی چینل مالک کے نہیں بلکہ وکیل فیصل صدیقی کے ہیں، تمام چینلز کی جانب سے دلائل کم و بیش ایک ہی طرح کے ہیں،بادی النظر میں چینلز کا جواب اطمینان بخش نہیں۔