آرمینیا نے فلسطینی ریاست کوباضابطہ طور پر تسلیم کر لیا

یریوان(آن لائن) آرمینیا نے فلسطینی ریاست کوباضابطہ طور پر تسلیم کر لیا ہے۔ آرمینیا کی وزارت خارجہ کی جانب سے جاری بیان میں کہا گیا ہے کہ ان کے ملک نے فلسطینی ریاست کو باضابطہ طور پر تسلیم کر لیا ہے۔ بیان میں کہا گیا کہ مختلف بین الاقوامی پلیٹ فارمز پر، ہم نے ہمیشہ مسئلہ فلسطین کے پرامن اور جامع حل کی وکالت کی ہے اور اسرائیل-فلسطینی تنازعہ کو حل کرنے کے دو ریاستی اصول کی حمایت کی ہے۔ہمیں یقین ہے کہ فلسطینیوں اور اسرائیلیوں کو اس بات کو یقینی بنانے کا واحد طریقہ یہی ہے کہ ان کی جائز خواہشات کا احساس کریں۔بیان میں کہا گیا کہ مذکورہ بالا کی بنیاد پر اور بین الاقوامی قانون اور مساوات، خودمختاری اور لوگوں کے پرامن بقائے باہمی کے اصولوں کے ساتھ اپنی وابستگی کا اعادہ کرتے ہوئے آرمینیا فلسطینی ریاست کو تسلیم کرتا ہے۔ناروے، آئرلینڈ اور سپین نے 28 مئی سے فلسطین کو بطور ریاست تسلیم کرنے کا اعلان کیا تھا، لیکن اسرائیل کی جانب سے ان کے فیصلے کی مذمت کی گئی۔3 جون کو اقوام متحدہ کے 20 سے زائد ماہرین اور خصوصی نمائندوں نے تمام ممالک سے فلسطینی ریاست کو تسلیم کرنے کا مطالبہ کیا۔ اب تک 140 سے زائد ممالک فلسطینی ریاست کو تسلیم کر چکے ہیں، جو اقوام متحدہ کی دو تہائی رکنیت کی نمائندگی کرتے ہیں